PDK: Gjykata Kushtetuese mbrojti rendin kushtetues nga ‘puçi qeveritar”

Partia Demokratike e Kosovës (PDK), mirëpret aktgjykimin e Gjykatës Kushtetuese të Kosovës për ta shpallur kundër kushtetues vendimin e Qeverisë Kurti për kufizimin e lirive dhe të drejtave themelore.

 Aktgjykimi i sotëm konfirmon ruajtjen e karakterit kushtetues dhe rendit demokratik të shtetit tonë ndaj çfarëdo përpjekjeje dashakeqëse të politikanëve, e fatkeqësisht në këtë rast të një qeverie, për ta marrë në dorë suprimimin e lirive e të drejtave të qytetarëve të Kosovës të cilat garantohen me kushtetutë dhe konventat ndërkombëtare për të drejtat dhe liritë e njerëzve që ka miratuar Kosova.

Shqetësimi i ngritur nga PDK ndaj këtij vendimi antikushtutues të qeverisë së shkarkuar Kurti si dhe nga shumë parti, institucione e qytetarë, sot fatmirësisht mori një epilog të drejtë dhe evitoi një precedent të rrezikshëm të Kryeministrit të shkarkuar Albin Kurti për t’i bërë një “puç qeveritar” rendit kushtetues e ligjor të vendit.

Republika e Kosovës përgjatë këtyre njëzet viteve, me gjithë sfidat e mëdha përpara, fatmirësisht ka arritur të themeloj institucione profesionale e të pavarura të cilat kanë gjykuar në mënyrë të paanshme dhe ruajtur karakterin kushtetues të vendit ndaj çfarëdo përpjekje politike për ta cenuar e sulmuar.

PDK kërkon nga qeveria e shkarkuar Kurti dhe aktorët e tjerë ta respektojnë këtë aktgjykim të Gjykatës Kushtetuese. PDK u bën thirrje qytetarëve të Kosovës të vazhdojnë të qëndrojnë në shtëpi dhe ti respektojnë kërkesat e vendimet e institucioneve shëndetësore pavarësisht epilogut përfundimtar që i ka dhënë Gjykata vendimit skandaloz të qeverisë, i cili do të mbahet mend si përpjekja e fundit dashakeqëse për ta cënuar rëndë demokracinë e brishtë të Kosovës.