Kandidati për kryeministër nga radhët e Partisë Demokratike të Kosovës Enver Hoxhaj, ka vizituar disa biznese në Fushë Kosovë, pronarët e të cilave janë nga Lugina e Preshevës.
Hoxhaj tha se prodhuesit nga Presheva, Medvegja dhe Bujanovci, do t’u ofrohet lirim nga tatimet doganore.
“Me programin tonë më të mirë të Rimëkëmbjes, prodhuesve nga Presheva, Medvegja dhe Bujanovci do t’ju njihet statusi i privilegjuar në Republikën e Kosovës ku do të përfitojnë nga lirimi i tatimeve doganore. Programi jonë, gjithashtu ua thjeshtëzon procedurat e eksportit të mallrave në Kosovë. Me këtë plan, të gjithë banorëve të Luginës do t’u lejohet punësimi i barabartë me qytetarët e Kosovës në institucione”.
Njëherësh i pari në detyrë i PDK-së tha se prioritet i programit të rimëkëmbjes ekonomike, do të jetë sektori privat.
“Në këto zgjedhje ka dy alternativa, njëra alternativë është që përmes sektorit privat të krijojmë vende të reja të punës, ta rrisim ekonominë, ta rrisim mirëqenien e qytetarëve dhe një alternativë tjetër që përkrahet nga VV që është një alternativë e së kaluarës. Prandaj, edhe me arkitektin biseduam për të gjitha kërkesat, propozimet dhe shqetësimet që kanë, në mënyrë që të përmirësohet edhe më shumë mbështetja e qeverisë së Kosovës për bizneset e tilla”.