Kampioni në fuqi i Italisë, Napoli, doli të hënën me njoftim për lëndimin e Amir Rrahmanit dhe Matteo Politanos.
Dy futbollistët u lënduan të shtunën në fitoren 1:0 të Napolit ndaj Sassuolos.
Kapiteni i Kosovës, Rrahmani, që është lider i mbrojtjes te napolitanët, u detyrua të largohet nga fusha në pjesën e dytë.
Napoli ka njoftuar se Rrahmani ka pësuar lëndim në pjesën e pasme të kofshës.
“Pas lëndimeve që pësuan në ndeshjen kundër Sassuolos, Matteo Politano dhe Amir Rrahmani, iu nënshtruan testeve mjekësore në Spitalin Pineta Grande. Politano ka pësuar një tërheqje muskulore në kofshën e djathtë. Rrahmani ka pësuar lëndim në pjesën e pasme të kofshës. Të dy lojtarët kanë filluar tashmë programet e tyre të rehabilitimit”, shkruan në njoftim.
Sajti “CalcioNapoli24” ka shkruar të hënën se rikuperimi i Rrahmanit mund të zgjasë nga dy javë deri në një muaj.
Ai pritet t’i mungojë Napolit në ndeshje shumë të rëndësishme si në Serie A ashtu edhe në Ligën e Kampionëve.
Për 31-vjeçarin ky është lëndimi i dytë që e pëson këtë edicion.