Transportuesit urbanë në Prishtinë kanë vazhduar protestën për të tretën ditë radhazi, pas bllokimit të kryeqytetit një ditë më parë, kur autobusët u vendosën para Komunës si reagim ndaj mosshlyerjes së obligimeve financiare. Ata kërkojnë pagesën e borxheve që, sipas përfaqësuesve të “Trafikut Urban”, kapin shifrën 1.6 milion euro, ndërsa pretendojnë se Komuna ka ndarë vetëm 600 mijë euro nga 3.2 milionët e alokuara nga Ministria e Financave. Sindikata thekson se situata po rëndohet dhe kërkon zgjidhje të menjëhershme.
Përplasjet institucionale janë ashpërsuar, pasi Ministria e Financave pretendon se mjetet do të alokohen plotësisht vetëm pasi Komuna të marrë vendimin për bartjen e të hyrave vetanake. Përparim Rama, kryetari i Prishtinës, fajin ia adreson Qeverisë, ndërsa Lëvizja Vetëvendosje e akuzon Ramën dhe LDK-në për menaxhim të dështuar. Ndërkohë, LDK-ja në nivel qendror kritikon Presidenten Vjosa Osmani për menaxhimin e procesit të buxhetit para shpërndarjes së Kuvendit, çka ka nxitur reagime të ashpra edhe nga ana e ministrit në detyrë të Financave, Hekuran Murati.
Kriza ka prekur drejtpërdrejt qytetarët, të cilët për ditën e dytë radhazi kanë mbetur pa transport publik dhe të ngujuar në kolonat e krijuara nga protestat. Shumë prej tyre shprehen të mllefosur me bllokadat, mungesën e qarkullimit dhe me atë që e cilësojnë si keqmenaxhim politik, duke theksuar se situata po ju kushton orë të tëra pritjeje dhe dëme në jetën e përditshme.