Kryetari i Ferizajt, Agim Aliu, ka folur rreth arrestimit të 12 personave në këtë Komunë, katër prej tyre në Drejtorinë e Bujqësisë, shkruan Gazeta Sinjali.
Përmes një konference për media, Aliu tha se ky aksion është më seriozi për ruajtjen e pyjeve dhe maleve të kësaj komune.
“Në koordinim të Komunës së Ferizajt dhe institucionet e rendit janë arrestuar 12 persona, prej tyre 8 janë zyrtarë të Komunës së Ferizajt, 5 janë rojtarë dhe 3 janë teknikë të pylltarisë. Kjo është dëshmia më e mirë që ne jemi të pa kompromis dhe lufta do të jetë e pa kompromis ndaj cilitdo zyrtar, ndaj pasurisë së shtetit”, tha Aliu.
Prokuroria Themelore në Ferizaj ka njoftuar se sot janë arrestuar 12 persona për shkak se dyshohet që kanë kryer veprën penale “keqpërdorim i pozitës apo autoritetit zyrtar” ,“marrje e ryshfetit”, dhe “dhënia e ryshfetit”, në Drejtorinë për Bujqësi dhe Pylltari në këtë komunë.
Sipas njoftimit, në mesin e të arrestuarve janë katër teknik të pylltarisë, katër rojtar të pyjeve si dhe katër qytetarë nga Komuna e Ferizajt, ndaj të cilëve iu është caktuar masa e ndalimit për 48 orë.