Në një kohë kur kostoja e jetesës është rritur ndjeshëm dhe pasiguria ekonomike është bërë pjesë e përditshmërisë, kursimi i parave mbetet një nga sfidat më të mëdha për shumicën e familjeve.
Ekspertët financiarë theksojnë se nuk ka një formulë të vetme magjike, por një kombinim hapash të vegjël dhe të qëndrueshëm që me kalimin e kohës krijojnë ndryshim të madh, ka shkruar “Gobankingrates.com”.
Një nga rekomandimet kryesore është krijimi i një buxheti të qartë mujor.
Shumë njerëz nuk e dinë saktësisht se ku shkojnë paratë e tyre dhe për këtë arsye përfundojnë duke shpenzuar më shumë sesa munden.
Mbajtja e një regjistri të thjeshtë të shpenzimeve, qoftë edhe në një aplikacion telefoni, ndihmon për të pasur një pasqyrë më reale mbi financat personale. Ky hap u lejon individëve t’i identifikojnë shpenzimet e panevojshme dhe të gjejnë mënyra për t’i reduktuar ato.
Një tjetër praktikë e rekomanduar është vendosja e kursimeve automatike.
Ekspertët sugjerojnë që menjëherë pas marrjes së pagës, një pjesë e caktuar të kalojë automatikisht në një llogari kursimi.
Kjo metodë i ndihmon njerëzit të kursejnë pa e ndier mungesën e menjëhershme të parave, duke e bërë procesin më të qëndrueshëm në periudhë afatgjate.
Gjithashtu, këshillohet të shmangen shpenzimet e vogla të shpeshta, të cilat shpesh injorohen, por që në fund të muajit shndërrohen në shifra të konsiderueshme.
Një kafe e përditshme jashtë shtëpisë apo blerje të vogla impulsive mund të duken të padëmshme, por kur mblidhen së bashku, paraqesin një barrë të madhe financiare.
Zëvendësimi i tyre me alternativa më të lira, si përgatitja e kafesë në shtëpi, është një mënyrë praktike për të kursyer.
Një tjetër element thelbësor është krijimi i një fondi emergjent.
Sipas specialistëve, ky fond duhet të mbulojë të paktën tre deri në gjashtë muaj shpenzime bazë, në mënyrë që të përballohen situata të papritura si humbja e punës apo shpenzime shëndetësore.
Kjo nuk është vetëm një çështje sigurie financiare, por edhe e qetësisë psikologjike.
Ekspertët gjithashtu sugjerojnë të bëhet rishikimi i rregullt i kontratave dhe shërbimeve të përditshme, qoftë për sigurimet, operatorin telefonik apo energjinë.
Shpeshherë konsumatorët paguajnë më shumë sesa duhet, vetëm sepse nuk e kanë shqyrtuar mundësinë e ofertave më të favorshme.
Raportet financiare tregojnë se kursimi nuk është vetëm një veprim i lidhur me disiplinën, por edhe me krijimin e zakoneve të mençura që përshtaten me jetën e përditshme.
Këshilla kryesore që del nga ekspertët është se çdo hap, sado i vogël, ka rëndësi.
Në vend që të pritet një moment ideal për të filluar, është më mirë të ndërmerren menjëherë ndryshime të vogla, të cilat me kalimin e kohës kthehen në stabilitet financiar.