Një studim i ri ka sugjeruar se vitamina D mund ta ngadalësojë plakjen biologjike deri në tre vjet.
Hulumtimi, i quajtur VITAL, përfshiu gra dhe burra mbi moshën 50 vjeç dhe i monitoroi për pesë vjet.
Rezultatet u botuan në The American Journal of Clinical Nutrition dhe zbuluan se vitamina D mbron telomeret, kapakët mikroskopikë në fund të kromozomeve të njeriut që shkurtohen me moshën dhe lidhen me sëmundje si kanceri, sëmundjet e zemrës dhe gjendje të tjera kronike.
“Gjetjet tona, që tregojnë se suplementimi me vitaminë D ruajti gjatësinë e telomereve në studimin VITAL, sugjerojnë se vitaminës D është premtuese në ngadalësimin e rrugës drejt plakjes biologjike dhe sëmundjeve kronike të lidhura me moshën”, ka thënë doktoresha Joann Manson, drejtuese e studimit dhe shefe e Departamentit të Mjekësisë Parandaluese në Brigham and Women’s Hospital, për The New York Post.
Megjithatë, ajo ka shtuar se këto rezultate duhet të konfirmohen në një tjetër provë klinike të pavarur para se të ndryshohen udhëzimet e përgjithshme për marrjen e vitaminës D.
“Nuk ka ende konsensus të qartë për nivelin optimal të vitaminës D në gjak. Për shembull, Akademia Kombëtare e Mjekësisë rekomandon nivele mbi 20 nanogramë për mililitër, ndërsa disa organizata të tjera kërkojnë 30 nanogramë për mililitër apo më shumë”, ka thënë Manson.
Kush ka më shumë nevojë për vitaminë D?
Sipas udhëzimeve të reja nga Shoqata e Endokrinologjisë, suplementet me vitaminë D rekomandohen për grupe të veçanta: të moshuarit mbi 75 vjeç, foshnjat dhe fëmijët, gratë shtatzëna dhe personat me prediabet.
Po ashtu, në rrezik për mungesë janë:
Të moshuarit në institucione ku ekspozimi në diell është i kufizuar
Personat me sëmundje që ndikojnë në përthithjen e lëndëve ushqyese
Ata që trajtohen për osteoporozë apo probleme me eshtrat
Personat me kufizime të mëdha në ushqim, si intoleranca e rëndë ndaj laktozës
Sa është sasia e sigurt?
Pjesëmarrësit në studimin VITAL konsumuan 2000 njësi në ditë (rreth 5 mililitra) dhe, sipas Manson, nuk pati efekte anësore.
“Kjo sasi është e sigurt për përdorim të përditshëm”, ka thënë ajo.
Por, ajo ka paralajmëruar se dozat shumë të larta, mbi 10,000 njësi/ditë, mund të shkaktojnë helmim, duke rritur kalciumin në gjak apo urinë.
Alternativat natyrale të vitaminës D
Nëse nuk preferoni suplementet, mund ta merrni vitaminën D edhe nga:
Peshqit e yndyrshëm si salmoni, sardelja dhe toni
Kërpudhat e egra
Disa lloje drithërash dhe lëngu i portokallit
Produktet e bulmetit
Drita e diellit, ku mjaftojnë 15 minuta ecje në diell disa herë në javë në mesditë
“Edhe ekspozimi i rastësishëm në diell, si gjatë kryerjes së punëve të përditshme, është i mjaftueshëm. Por edhe më i rëndësishëm është aktiviteti fizik në ambient të hapur, si ecja e shpejtë, vrapi apo sportet”, ka thënë Manson.
Ajo ka thënë gjithashtu se suplementet plotësojnë, por nuk zëvendësojnë jetesën e shëndetshme
“Mos harroni që marrja e një suplementi nuk zëvendëson një dietë të shëndetshme dhe një stil jetese aktiv. Është shumë më e lehtë të marrësh një pilulë sesa të ushqehesh mirë dhe të jesh fizikisht aktiv, por pikërisht këto faktorë të jetesës janë ata që mbrojnë më shumë nga sëmundjet e zemrës, kanceri, diabeti i tipit 2 dhe problemet e tjera të lidhura me moshën”, tha Manson.