Akademiku Arsim Bajrami ka shpallur zyrtarisht kandidaturën e tij për postin e Presidentit të Republikës së Kosovës, duke u bërë thirrje liderëve të partive politike për unitet dhe konsensus në zgjedhjen e kreut të shtetit.
Përmes një postimi në Facebook, Bajrami iu drejtua kryetarit të Lëvizjes Vetëvendosje, Albin Kurti, kryetarit të PDK-së, Bedri Hamza, kryetarit të LDK-së, Lumir Abdixhiku, si dhe kryetarit të AAK-së, Ramush Haradinaj, duke theksuar nevojën për tejkalim të dallimeve partiake në funksion të stabilitetit institucional.
Ai vlerësoi se vendi ndodhet në një moment të rëndësishëm për funksionimin kushtetues dhe stabilitetin politik, duke paralajmëruar se mungesa e konsensusit mund të çojë në krizë institucionale, shpërndarje të Kuvendit dhe zgjedhje të parakohshme.
Bajrami theksoi sfidat gjeopolitike dhe të sigurisë me të cilat përballet Kosova, duke nënvizuar se Presidenti duhet të jetë figurë unifikuese, mbi-partiake dhe garantuese e unitetit politik e qytetar.
Në letrën e tij, ai renditi përvojën shumëvjeçare në proceset kyçe të shtetndërtimit që nga vitet ’90, përfshirë kontributin në hartimin e akteve themelore kushtetuese, pjesëmarrjen në negociatat e Rambujesë dhe procesin e Vjenës për pavarësinë e Kosovës, si dhe angazhimin gjatë luftës çlirimtare të Ushtria Çlirimtare e Kosovës.
“Me bindje se i plotësoj kushtet profesionale, politike dhe morale për një kandidaturë konsensuale, shpreh gatishmërinë time për të vënë veten në dispozicion të institucioneve dhe të spektrit politik”, ka shkruar ai.
Bajrami gjithashtu vlerësoi qëndrimin e Prof. Dr. Murat Jasharit dhe familjes Jashari, duke theksuar rëndësinë e ruajtjes së karakterit çlirimtar të luftës së UÇK-së dhe kundërshtimin e çdo përpjekjeje për rishikim selektiv të historisë nga Dhomat e Specializuara.
Ai përmbylli letrën me zotimin për angazhim të vazhdueshëm institucional dhe publik në mbrojtje të rendit kushtetues, stabilitetit institucional dhe perspektivës evropiane të Kosovës.
Letra e plotë:
Thirrje për unitet politik për zgjedhjen e Presidentit të Republikës së Kosovës
I nderuar Z. Albin Kurti, Kryetar i Lëvizjes Vetëvendosje,
I nderuar Z. Bedri Hamza, Kryetar i Partisë Demokratike të Kosovës,
I nderuar Z. Lumir Abdixhiku, Kryetar i Lidhjes Demokratike të Kosovës,
I nderuar Z. Ramush Haradinaj, Kryetar i Aleancës për Ardhmërinë e Kosovës,
Në këtë moment të rëndësishëm për stabilitetin institucional dhe funksionimin kushtetues të Republikës së Kosovës, ju drejtohem me thirrjen që, përtej dallimeve politike dhe interesave partiake, të ndërtohet një unitet politik konsensual për zgjedhjen e Presidentit të Republikës së Kosovës, me qëllim të shmangies së krizave të panevojshme institucionale, rrezikut të shpërndarjes së Kuvendit dhe mbajtjes së zgjedhjeve të parakohshme.
Duke pasur parasysh sfidat komplekse gjeopolitike dhe të sigurisë me të cilat përballet Republika e Kosovës, të cilat kërkojnë maturi shtetërore, unitet politik dhe përgjegjësi të lartë institucionale;
Duke marrë në konsideratë nevojën imperative për përmbylljen e qëndrueshme të procesit të shtetndërtimit, në përputhje me Kushtetutën e Republikës së Kosovës, parimin e sovranitetit shtetëror dhe orientimin euroatlantik të vendit;
Duke çmuar rolin kushtetues të Presidentit të Republikës si figurë unifikuese, mbi-partiake dhe përfaqësuese e unitetit politik dhe qytetar të popullit të Kosovës;
Duke u bazuar në përvojën time shumëvjeçare në të gjitha fazat kyçe të shtetndërtimit të Kosovës që nga viti 1990, përfshirë rezistencën institucionale, ndërtimin e rendit kushtetues dhe proceset vendimtare të tranzicionit politik;
Duke qenë njëri ndër hartuesit e të gjitha akteve themelore kushtetuese të Kosovës, si dhe duke dhënë kontributin tim politik, juridik dhe institucional gjatë luftës çlirimtare të Ushtrisë Çlirimtare të Kosovës, në funksion të realizimit të së drejtës së popullit të Kosovës për liri, vetëvendosje dhe shtet të pavarur;
Duke pasur përvojë të drejtpërdrejtë në negociatat ndërkombëtare për lirinë e Kosovës në Rambuje dhe për pavarësinë e saj në procesin e bisedimeve të Vjenës;
Duke njohur në mënyrë të thelluar sistemin kushtetues, juridik dhe institucional të Republikës së Kosovës, si dhe mekanizmat e funksionimit të institucioneve në plan vendor dhe ndërkombëtar;
Duke ndërtuar ndër vite bashkëpunim institucional korrekt, dialog politik konstruktiv dhe respekt reciprok me të gjitha subjektet politike;
Me bindje se i plotësoj kushtet profesionale, politike dhe morale për një kandidaturë konsensuale në funksion të unitetit politik dhe funksionimit kushtetues të institucioneve të Republikës së Kosovës,
Shpreh gatishmërinë time për të vënë veten në dispozicion të institucioneve dhe të spektrit politik dhe të qytetarëve të vendit si njëri prej kandidatëve konsensual për President të Republikës së Kosovës, me përkushtim të plotë ndaj unitetit kombëtar, forcimit të rendit kushtetues, stabilitetit institucional dhe përmbylljes të procesit të shtetndërtimit, në shërbim të qytetarëve dhe të perspektivës evropiane të Republikës së Kosovës.
Njëkohësisht, vlerësoj lartë qëndrimin dinjitoz, parimor dhe shtetformues të kolegut dhe mikut tim të fakultetit,Prof.dr.Murat Jashari dhe të familjes Jashari, të cilët, në frymën e përgjegjësisë kombëtare dhe respektit për sakrificën historike të familjes heroike dëshmuan edhe njëherë vigjilencen e lartë kombëtare.
Ju, shpreh gatishmërinë time për angazhim të vazhdueshëm institucional, akademik dhe publik në mbrojtje të karakterit çlirimtar dhe të drejtë të luftës së Ushtrisë Çlirimtare të Kosovës, si dhe, kundër çdo përpjekjeje për demonizimin e saj apo për rishikimin selektiv e diskriminues të historisë nga Dhomat e Specializuara, në kundërshtim me parimet themelore të drejtësisë dhe të së vërtetës historike.
Me respekt të veçantë institucional,
Prof. Dr. Arsim Bajrami
Anëtar i rregullt i Akademisë së Shkencave dhe Arteve të Kosovës
Anëtar i rregullt i Akademisë Shqiptare të Arteve dhe Shkencave
Anëtar i rregullt i Akademisë Evropiane të Shkencave dhe Arteve