Rikandidimi i Ramiz Lladrovcit për një mandat të katërt në krye të Drenasit, rrezikon të përçajë bastionin e pathyeshëm të Partisë Demokratike të Kosovës. Figura të lidhura me PDK-në kanë shpallur kandidaturat e tyre, ndërsa PDK-ja ndodhet para një dileme: të rikandidojë Lladrovcin, apo ta zëvendësojë atë me një emër tjetër.
Nëse doni të gjeni kuptim më të përafërt të termit “fushëbetejë” në kontekstin politik, atë e gjeni në situatën politike për një komunë relativisht të vogël në zemër të Kosovës, Drenasin.
Komuna, e cila nuk ndodhet as në mesin e dhjetë komunave më të populluara në vend, është padyshim zona më e populluar me kandidatë për kryetar.
Drenasi, më shumë se tre muaj para zgjedhjeve lokale të 12 tetorit, pothuajse çdo ditë gjatë dy javëve të fundit regjistroi nga një emër të ri në regjistrin e kandidaturave për kryetar. Deri më sot, gjashtë veta janë vetshpallur kandidatë.
Të fundit, vërshuan nominimet brenda Partisë Demokratike të Kosovës, një subjekti që ka qeverisur me komunën që prej zgjedhjeve të para të pasluftës në Kosovë.
Kryetari aktual Ramiz Lladrovci e zyrtarizoi të hënën vendimin e tij për të rikandiduar edhe për një mandat të katërt për shef komunal.
Zyrtarizimi i kandidaturës së Lladrovcit të hënën, nuk e zuri në befasi pothuajse askënd. Është një lëvizje që pritej.
Pikërisht kjo lëvizje e kryetarit që e ka përçarë Degën e PDK-së në Drenas që prej marrjes së udhëheqjes komunale në dhjetorin e vitit 2016, shkaktoi një reaksion të kandidaturave në Drenas për zgjedhjet e 12 tetorit.
Nga gjashtë kandidaturat e shpallura për garën politike të Drenasit, shumica e figurave kanë lidhje me Partinë Demokratike të Kosovës.
Të hënën, kandidaturën për kryetar e shpalli Petrit Hajdari, një nga figurat e reja të PDK-së në Drenas që fitoi 16 mijë vota në zgjedhjet parlamentare të 9 shkurtit.
Hajdari tha se kandidaturën e tij e ka deponuar në Kryesinë e PDK-së, e cila ditëve në vijim do të shqyrtojë emrat dhe të nominojë vetëm një kandidat.
“Kryetari i rizgjedhur Memli Krasniqi, kryesia e PDK-së në të cilën jam anëtar dhe Këshilli Drejtues i Partisë e dinë fare mirë që pavarësisht pozitës e llojit të zgjedhjeve ku kam marrë pjesë, për mua prioriteti numër një dhe i patjetërsueshëm ka qenë qytetari i Drenasit tim”, tha ai në një deklaratë të hënën.
Driton Ajazi, praktikisht një mbështetës i Partisë Demokratike të Kosovës (PDK), i cili e rivalizoi Lladrovcin në zgjedhjet e para katër vitesh duke e çuar garën në balotazh, do të jetë sërish kundër-kandidat i kryetarit aktual.
Ajazi, i cili konsiderohet si një nga rivalët kryesorë të Lladrovcit, ka origjinën nga Kizhnareka e Drenasit, një fshati tradicionalisht të lidhur me PDK-në, veçanërisht për shkak të lidhjeve të ngushta me UÇK-në. Kizhnareka është vendlindja e Azem Sylës, shefit të parë të Shtabit të Përgjithshëm të UÇK-së.
Në zgjedhjet e vitit 2021, Ajazi e humbi garën në balotazh ndaj Lladrovcit për vetëm një mijë e shtatëqind vota.
Por, zgjedhjet e këtij viti pritet të krijojnë ndasi të tjera brenda votuesit tradicional të PDK-së me një tjetër përkrahës të PDK-së që ka shpallur kandidaturën.
Ish-kryesuesi i Kuvendit Komunal të Drenasit, Naim Bazaj, do të garojë nën siglën e “Iniciativës për Drenasin”.
Ai vjen nga Tërsteniku, një nga fshatrat më të mëdha të Drenasit dhe është një tjetër rival i moçëm lokal i Ramiz Lladrovcit.
Në parafushatën e zgjedhjeve të vitit 2016, Bazaj, asokohe zyrtarisht pjesë e PDK-së, kishte bërë fushatë 12-ditore nëpër fshatrat e Drenasit duke u paraqitur si kandidat i partisë për zgjedhjet e ardhshme lokale.
Kur partia e kishte nominuar Lladrovcin për kryetar, ai i indinjuar kishte shpallur kundër-kandidaturën e tij ndaj Lladrovcit si kandidat i pavarur.
Në momentet e fundit, në një tubim të ftuar me përkrahësit e tij ku planifikoi të zyrtarizonte nisjen e fushatës për për kryetar, Bazaj i befasoi edhe përkrahësit e tij duke u shfaqur përkrah Kadri Veselit, asokohe kryetarit të PDK-së.
Me ndërmjetësimin e Veselit, Bazaj tha se do ta përkrahte PDK-në dhe Lladrovcin në zgjedhje, ndonëse vetëm disa më përpara kishte akuzuar Kryesinë e PDK-së për “sjellje me zarf” të nominimit të Lladrovcit.
Bazaj, siç ishte dëshmuar në fushatën e zgjedhjeve të vitit 2016, ka një përkrahje të konsiderueshme për të luajtur rol kyç si lojtar në zgjedhjet komunale. Baza e përkrahësve të tij është Tërsteniku, vendi i tij i lindjes.
Edhe Vasileva, një fshat tjetër i Drenasit, do të ketë një përfaqësues të vetin në garë.
Ajvaz Berisha, një ish-komandant i Njësisë Speciale të UÇK-së, e ka shpallur të martën kandidaturën për kryetar komune.
Berisha ka thënë se do të garojë si përfaqësues i partisë “Bashkimi Demokratike”, një subjekti të cilën e ka themeluar vet.
Ajvaz Berisha është një nga figurat më të shquara të luftës çlirimtare. Në të kaluarën, Berisha ka shërbyer si konsull i Republikës së Kosovës në Gjermani dhe ka qenë dekan i Fakultetit të Edukimit Fizik në Universitetin e Prishtinës.
Në vitin 2019, ai u bë pjesë e Lëvizjes Vetëvendosje, por u tërhoq nga partia pas një viti në prag të zgjedhjeve parlamentare të vitit 2021.
Kandidatura e gjashtë është Xhavit Drenori, një profil ndryshe nga pesë të tjerët. Ai ka më pak lidhje me PDK-në. Është një kritik i ashpër i Partisë Demokratike të Kosovës dhe po ashtu i kryetarit Lladrovci.
Për të kompletuar diversitetin e garës, Drenori garon me “Green Për Drenasin” (GPD), një iniciativë qytetare e profilizuar në ambientalizëm, që synon mbrojtjen e ambientit dhe mjedisit.
Drenori ka garuar për kryetar komune në zgjedhjet e vitit 2016, në të cilat mori rreth 12 për qind të votave, por u deklasua keq në zgjedhjet e fundit lokale të vitit 2021, ku mori 4% të votave, apo afër 900 vota në total.
Njëjtë sikurse Ajvaz Berisha, edhe Drenori e provoi Vetëvendosjen, në të cilën aderoi në vitin 2019 disa javë para zgjedhjeve parlamentare të mbajtura po atë vit.
Por, qëndrimi i tij në partinë e Kurtit ishte shumë jetë-shkurtër, pasi u largua pak para dorëzimit të listave të kandidatëve për deputetë. Drenori tha se ndihej i mashtruar nga Kurti që, sipas tij, i kishte premtuar nominimin e dy kandidatëve për deputetë nga Qendra e LVV-së në Drenas, por në fund i kishte ndryshuar fjalët. /Paparaci.com