Premier League ka nisur dhe Antonio Conte i ka idetë e qarta për organikën me të cilën do të përballojë sezonin, teksa ka “djegur” plot 4 futbollistë, të cilët duhet të gjejnë ekip tjetër deri në fund të merkatos.
Tanguy Ndombele, Giovanni Lo Celso, Harry Winks dhe Sergi Reguilon janë 4 futbollistët që nuk bëjnë më pjesë në planet e Tottenham dhe Conte i ka dërguar të stërviten veçmas deri sa të gjejnë një ekip tjetër.
SuperSport shkruan se dy të parët kanë kërkesa nga Italia, me Napolin që sheh te Ndombele zëvendësuesin ideal të Fabian Ruiz dhe Fiorentinën që dëshiron Lo Celson për të kompletuar formacionin.
Sa i përket Reguilon, disa klube spanjolle janë gati ta marrin në huazim, megjithatë deri në fund të merkatos të 4 duhet të gjejnë një tjetër ekip për të mos mbetur pa luajtur, pasi mesazhi i Contes është i qartë.