Dosja e rastit të Hysni Gucatit e Nasim Haradinajt i kalon trupit gjykues

Dosja e rastit të ish-krerëve të Organizatës së Veteranëve të Luftës, Hysni Gucati dhe Nasim Haradinaj, tashmë ka kaluar te trupi gjykues.

Kështu është bërë e ditur përmes një vendimi të gjyqtarit paraprak, Nicolas Guillou, të publikuar në faqen zyrtare të Dhomave të Specializuara të Kosovës në Hagë.

Gjithashtu, është bërë e ditur se me një vendim unanim trupi gjykues në këtë rast e ka zgjedhur si kryetar gjyqtarin Charles L. Smith III.

Ndërkaq, javën e kaluar është bërë e ditur se kryetarja e kësaj gjykate, ka caktuar trupin gjykues që në përbërje të gjyqtarëve Charles Smith III, Christoph Barthe dhe Guénaël Mettraux. Kurse, thuhej se Fergal Gaynor do të jetë gjykatësi rezervë.

Hysni Gucati, së bashku me Nasim Haradinajn, po akuzohen për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës, raporton “Betimi për Drejtësi”.

“Akuzat e paraqitura në aktakuzën e konfirmuar mbështeten në dyshimin e bazuar mirë se së paku midis 7 dhe 25 shtatorit 2020, z. Gucati dhe z. Haradinaj zbuluan pa autorizim informacion të mbrojtur prej Ligjit të Dhomave të Specializuara, ndër të cilat të dhëna identifikuese të disa dëshmitarëve (të mundshëm), në tre konferenca shtypi dhe aktivitete të tjera të transmetuara, si edhe përmes shpërndarjes së mëtejshme ku përfshihen deklaratat në rrjetet sociale”, thuhej në njoftimin e Dhomave të Specializuara.

Gucati dhe Haradinaj ngarkohen se kanë bërë komente nënçmuese kundër dëshmitarëve të mundshëm dhe në mënyrë të përsëritur shprehen synimin e tyre për të dëmtuar punën e Dhomave të Specializuara.

“Me këto veprime, z. Gucati dhe z. Haradinaj shkelën fshehtësinë e procedurës dhe frikësuan dëshmitarë (të mundshëm) të Zyrës së Prokurorit të Specializuar dhe si pasojë penguan punën dhe hetimet e ZPS-së.”, thuhej në njoftimin e Dhomave të Specializuara të Kosovës.