Haxhi Krasniqi është kampion bote në versionin WBA, në kategorinë gjysmë të rëndë, dhe në versionin IBO.
Boksieri shqiptar priti 15 vite për ta bërë realitet ëndrrën e tij që të jetë kampion bote.
Krasniqi u bë kampion bote pasi në përballje me gjermanin Dominic Boesel triumfoi pasi e nokautoi kundërshtarin në raundin e tretë.
Pas meçit Krasniqi dha një deklaratë emocionuese, duke thënë se ka qarë dhe ka qeshur gjatë këtyre viteve për ta arritur qëllimin e tij.
“I uroj Dominicut rikthim të shpejtë. Jemi familje e madhe… Kjo luftë ka zgjatur 15 vjet. Kam pasur ulje dhe ngritje. Kam qarë, kam qeshur. Tani kam arritur të përmbush ëndrrat e mia”, ka deklaruar Krasniqi.
33-vjeçari ka 57 meçe të zhvilluara në boksin profesionist, ku ka marrë 51 fitore e gjashtë disfata.
Meçi ndaj Boesel ishte i treti për kampion bote në katër versionet e mëdha si WBC, WBA, IBF e WBO, por në dy herët e kaluara kishte pësuar humbje.