Lidhja Demokratike e Kosovës (LDK), ka vendosur që Lumir Abdixhiku të vazhdojë të ushtrojë funksionin e kryetarit të partisë, pavarësisht rezultatit zhgënjyes të LDK-së në zgjedhjet e 28 dhjetorit. Vendimi u mor pas diskutimeve të brendshme në strukturat më të larta të partisë.
Kryetari i LDK-së, Lumir Abdixhiku, gjatë mbledhjes së Kuvendit të partisë të mbajtur të shtunën, kishte ofruar dorëheqjen e tij si akt përgjegjësie politike pas dështimit elektoral. Megjithatë, delegatët e Kuvendit, përmes një votimi të fshehtë, vendosën që Abdixhiku të vazhdojë mandatin e tij në krye të partisë.
Sipas burimeve nga brenda LDK-së, shumica e delegatëve vlerësuan se stabiliteti i brendshëm dhe vazhdimësia e reformave të nisura janë të domosdoshme në këtë fazë politike, duke konsideruar se ndryshimet e menjëhershme në udhëheqje mund të thellojnë krizën pas zgjedhjeve.
Abdixhiku, pas vendimit të Kuvendit, ka falënderuar delegatët për besimin e dhënë dhe ka theksuar se do të vazhdojë angazhimin për reformimin e partisë dhe rikthimin e besimit të qytetarëve. Ai ka theksuar se LDK-ja ka nevojë për reflektim të thellë, analizë të rezultatit zgjedhor dhe riorganizim të strukturave në të gjitha nivelet.
Vendimi për vazhdimin e mandatit të Abdixhikut pritet të pasohet me mbledhje të tjera të organeve të partisë, ku do të diskutohen hapat konkretë për reformë dhe strategjia politike e LDK-së në periudhën e ardhshme.