Procesi zgjedhor u mbajt në Prishtinë me pjesëmarrjen e delegatëve të Kuvendit të OEK-së dhe përfaqësuesve të komunitetit të biznesit nga sektorë të ndryshëm të ekonomisë së vendit. Sipas njoftimit të Odës Ekonomike të Kosovës, votimi është zhvilluar në përputhje me procedurat demokratike dhe transparente të organizatës.
Pas rizgjedhjes, Lulzim Rafuna falënderoi anëtarët e Odës për besimin e dhënë, duke vlerësuar se mbështetja e marrë paraqet një përgjegjësi të madhe për të vazhduar punën në mbrojtjen dhe përfaqësimin e interesave të bizneseve kosovare.
Ai theksoi se gjatë mandatit të ri do të angazhohet për forcimin e rolit të OEK-së si zëri kryesor i komunitetit të biznesit në Kosovë, si dhe për thellimin e bashkëpunimit me institucionet vendore dhe ndërkombëtare.
Rafuna u zotua se prioritetet e tij do të jenë avancimi i dialogut ndërmjet sektorit privat dhe institucioneve shtetërore, përmirësimi i klimës së të bërit biznes, mbështetja e investimeve dhe rritja e konkurrueshmërisë së ekonomisë së Kosovës.
Po ashtu, ai theksoi rëndësinë e promovimit të potencialit ekonomik të vendit dhe përmirësimit të imazhit të Kosovës në arenën ndërkombëtare, me qëllim tërheqjen e investimeve të reja dhe krijimin e mundësive më të mëdha për bizneset vendore.
Oda Ekonomike e Kosovës ka ritheksuar përkushtimin e saj për të qenë partner i bizneseve dhe institucioneve, duke punuar në krijimin e një mjedisi më të favorshëm për zhvillim ekonomik, rritje të qëndrueshme dhe hapje të vendeve të reja të punës.