Presidenti i Francës, Emmanuel Macron, e quajti Rusinë e Vladimir Putin kundërshtare që nuk do të ndalet në Ukrainë nëse mposht trupat e Kievit në konfliktin dyvjeçar, duke u bërë thirrje evropianëve që të mos jenë “të dobët”, por të bëhen gati që të përgjigjen.
Ai ka thënë se nëse Evropa duhet të bëhet gati për luftë nëse dëshiron paqe.
Muajin e kaluar, Macron pati shkaktuar kundërthënie kur deklaroi se nuk e përjashton mundësinë e dislokimit të trupave tokësore në Ukrainë në të ardhmen, përderisa shumë udhëheqës u distancuan nga ky qëndrim ndërkaq disa të tjerë, veçmas në Evropën Lindore, e mbështetën këtë ide.
“Nëse Rusia e fiton këtë luftë, besueshmëria e Evropës do të reduktohej në zero”, ka deklaruar Macron gjatë një interviste televizive në Francë, pasi udhëheqësit opozitarë francezë e kritikuan për deklaratën e dislokimit të ushtarëve në Ukrainë. Por, Macron ka thënë se nuk pajtohet aspak me udhëheqësit opozitarë.
“Sot, të zgjedhësh të abstenosh apo të votosh kundër mbështetjes së Ukrainës nuk është të zgjedhësh paqen, por të zgjedhësh humbjen. Ka dallim”, ka deklaruar ai.
Partia kryesore opozitare e Macronit e Marine Le Pen nga ekstremi i djathtë, më herët gjatë javës abstenoi gjatë votimit për një marrëveshje të sigurisë që Franca nënshkroi me Ukrainën, ndërkaq një parti e majtë votoi kundër.
“Nëse lufta zgjerohet në Evropë, Rusia do të fajësohet. Por, nëse ne vendosim të jemi të dobët, nëse vendosim sot që nuk do të përgjigjemi, nënkupton se veçse kemi zgjedhur humbjen. Unë nuk e dua këtë”, ka thënë Macroni.
Ai ka shtuar se është e rëndësishme për Evropën që të mos vendosë vija të kuqe, që sipas tij do të dërgonte sinjal dobësie në Kremlin dhe do të inkurajonte Rusinë që të vazhdojë me pushtimin e Ukrainës. Macroni ka refuzuar të japë detaje se si do të dukej një dislokim në Ukrainë.
“Nuk e dua këtë. Dua që Rusia të ndalojë luftën dhe të tërhiqet nga pozicionet e saj dhe të lejojë që të ketë paqe”, ka thënë ai. “Nuk do t’i japë detaje dikujt që nuk më jep asgjë. Kjo është për presidentin Putin. Kam arsye që nuk jam preciz”.
Macron u shpreh se Franca kurrë nuk do të niste një ofensivë kundër Rusisë dhe se Parisi nuk është në luftë me Moskën, pavarësisht faktit që Rusia ka nisur sulme agresive ndaj interesave franceze në dhe jashtë Francës.
“Regjimi i Kremlinit është kundërshtar ”, ka potencuar Macron duke refuzuar që ta quajë armike Rusinë. Ai po ashtu ka thënë se Putini po bën kërcënime për sulme me armë bërthamore, të cilat sipas tij, nuk janë deklarata të duhuara.
Macron u shpreh se Ukraina gjendet në një situatë “të vështirë” në terren dhe se ka nevojë për mbështetje të fuqishme nga aleatët.
“Paqja nuk do të thotë kapitullimi i Ukrainës. Nëse do paqe nuk nënkupton mposhtje. Paqja nuk nënkupton që të heqim dorë nga Ukraina”, ka thënë Macroni.
Udhëheqësi francez po ashtu ka thënë se shpreson që do të vijë një ditë që paqja të negociohet me një president rus “kushdo qoftë ai”.
Ai po ashtu ka njoftuar se nuk ka anuluar vizitën e planifikuar në Ukrainë për shkaqe sigurie. “Kështu tha Rusia. Nuk duhet t’iu besoni atyre”, u shpreh tutje Macroni. /REL/