Kosova pret që marrëdhëniet e saj me SHBA-në të avancohen me zgjedhjen e Joe Biden president, pasi mbështetja prej dekadash e amerikanëve u vu në dyshim nën administratën Trump.
Kështu ka thënë për Financial Times, presidentja në detyrë e Kosovës, Vjosa Osmani.
“Të gjithë e dinë që presidenti i zgjedhur Biden është një mik i veçantë i Kosovës”, ka thënë Vjosa Osmani në një intervistë për Financial Times, përcjell Telegrafi, duke iu referuar mbështetjes së gjatë të z. Biden për ndërhyrjen e NATO-s dhe dialogun midis Serbisë dhe Kosovës. “Ai e di dhimbjen tonë shumë mirë”.
Zonja Osmani mori rolin e presidentes në detyrë në fillim të nëntorit pasi paraardhësi i saj, Hashim Thaçi, dha dorëheqje për t’u përballur me akuza për krime lufte të ngritura nga një gjykatë speciale me seli në Hagë.
Sipas FT, pas një lufte brutale që pasoi shpërbërjen e ish-Jugosllavisë, SHBA ka luajtur prej kohësh një rol kryesor në marrëdhëniet midis Serbisë dhe Kosovës.
Por shkruan më tej FT, ndërsa z. Trump kërkoi të angazhohej, disa i panë ndërhyrjet e tij si shërbim të interesave të ngushta ekonomike dhe politike të SHBA-së.
“Joe Biden e di të vërtetën, dhe e vërteta është shumë e thjeshtë”, ka thënë zonja Osmani. “Serbia e humbi Kosovën sepse abuzoi me parimin e sovranitetit dhe integritetit territorial për të vrarë njerëzit që jetuan në atë territor, për të kryer gjenocid në tentativë, krime lufte dhe krime kundër njerëzimit. Ai e di të vërtetën dhe nuk do të përpiqet të ndryshojë të vërtetën”.
Dhe siç vë në pah FT, përcjell Telegrafi, si senator amerikan, z. Biden ishte një avokat i zëshëm i ndërhyrjes amerikane në luftën e Kosovës 1998-99, në të cilën Ushtria Çlirimtare e Kosovës zhvilloi një kryengritje guerile kundër forcave të Sllobodan Millosheviçit.
Por ndërsa shumica e krimeve janë kryer nga forcat serbe, akuzat për krime lufte kanë ndjekur gjithashtu anëtarët e UÇK-së, shumë prej të cilëve u zhvendosën në politikë.
Në shkrimin e Financial Times vlerësohet se qasja e pritshme e një administrate të ardhshme Biden bie në kontrast me përpjekjet e administratës Trump për të ndërmjetësuar një marrëveshje të shpejtë midis liderëve të Kosovës dhe Serbisë.
Sidoqoftë, siç thuhet tutje, në vend që të vendosnin mosmarrëveshjet dypalëshe midis Beogradit dhe Prishtinës në fokus, fokusi i marrëveshjeve ishte në përparësitë e politikës së jashtme të SHBA-së, të tilla si njohja e Jerusalemit si kryeqyteti i Izraelit dhe premtimi për të mos dhënë licenca 5G për kompanitë “e pabesueshme” – që gjerësisht besohet të jetë një aludim për kompaninë e teknologjisë kineze Huawei.
Në pranverë, shkruan Financial Times, Uashingtoni inkurajoi rrëzimin e një qeverie anti-korrupsion në Kosovë sepse kryeministri i saj nuk ishte i interesuar në drejtimin e negociatave me Serbinë, të shtyra nga administrata Trump.