Rendi në të cilin hani ushqimet gjatë vakteve mund të ndikojë në shëndet. Kështu kanë sugjeruar disa ekspertë të ushqyerjes. Koncepti njihet si “sekuencimi i vakteve” dhe nënkupton që fillimisht të konsumohen perime pa niseshte të pasura me fibra, më pas proteina dhe yndyra të shëndetshme, dhe në fund karbohidratet.
Ky rend, sipas ekspertëve që folën për Fox News, mund të ndihmojë në:
-parandalimin e rritjeve të menjëhershme të sheqerit në gjak,
-rritjen e ndjesisë së ngopjes, dhe
-humbjen e peshës.
“Të fillosh me perime, proteina dhe yndyra të shëndetshme, përpara se të konsumosh niseshte apo ushqime me sheqer, mund të ndihmojë në zbutjen e rritjes së sheqerit në gjak pas vakteve”, ka thënë dietologia Caroline Susie.
Ajo ka shtuar se ky efekt është veçanërisht i dobishëm për personat me rezistencë ndaj insulinës, prediabet ose diabet të tipit 2.
Pse është e rëndësishme renditja?
Pas vakteve, rritja e niveleve të sheqerit në gjak (hiperglicemia) mund të rrisë rrezikun për zhvillimin e diabetit të tipit 2, sipas një raporti të universitetit UCLA. Kontrollimi i këtyre niveleve ndihmon edhe në trajtimin e obezitetit dhe diabetit.
Një studim i publikuar në revistën Nutrients zbuloi se pacientët që aplikonin këtë mënyrë ngrënie, duke konsumuar perime përpara karbohidrateve të rafinuara, patën përmirësim të dukshëm në kontrollin e sheqerit në gjak pas pesë vjetësh. Ndërkohë, grupi që nuk e praktikoi këtë metodë nuk pa përmirësime.
“Ajo që shkakton rritjen e sheqerit është konsumimi i tepërt i karbohidrateve”, ka thënë dietologia tjetër Sandra J. Arevalo, nga New Yorku, për Fox News Digital.
Ajo ka shtuar se kur karbohidratet konsumohen të parat, situata përkeqësohet.
“T’i hash karbohidratet vetëm e përkeqëson situatën. Por kur i konsumon së bashku me proteina dhe fibra, efekti i tyre zbutet sepse përthithen më ngadalë”, ka shpjeguar ajo.
Rendi që rekomandojnë ekspertët:
-Fillo me perime pa niseshte (si brokoli, spinaqi, sallata): me fibra që rregullojnë tretjen.
-Pastaj konsumo proteina dhe yndyra të shëndetshme: ndihmojnë të ndiheni të ngopur dhe e ngadalësojnë përthithjen e glukozës.
-Në fund, konsumoni karbohidratet: kjo mund të ndihmojë në uljen e sheqerit në gjak.
Kjo mënyrë ngrënieje mund të ndikojë pozitivisht edhe në menaxhimin e oreksit. Sipas Arevalo, “Kur filloni me ushqime të pasura me fibra dhe më pas pini ujë, fibra ju ndihmon të ndiheni të ngopur dhe kështu zvogëlon oreksin”.
Cilat karbohidrate janë të mira e cilat jo?
Karbohidratet komplekse, si perimet, fasulet dhe bishtajoret, janë të pasura me fibra dhe treten ngadalë, duke shkaktuar rritje të vogël të sheqerit në gjak.
Karbohidratet e rafinuara, si sheqeri, orizi i bardhë dhe mielli i bardhë, treten shpejt dhe shkaktojnë ngritje të menjëhershme të sheqerit.
Ekspertët rekomandojnë përdorimin e indeksit glikemik, një sistem që vlerëson sa shpejt një ushqim e rrit sheqerin në gjak, për të bërë zgjedhje më të shëndetshme.
Kujdes, kjo metodë s’është për të gjithë
“Të gjithë reagojnë ndryshe ndaj mënyrave të ndryshme të ushqyerjes”, ka theksuar Arevalo.
Ajo dhe Susie rekomandojnë që çdo person që dëshiron të provojë “meal sequencing” të konsultohet me një dietolog të licencuar për të ndërtuar një plan ushqyes të përshtatshëm dhe për të monitoruar nivelet e sheqerit në mënyrë të sigurt.