Të shtëna me armë zjarri janë raportuar të enjten në lagjen Mati 1 në Prishtinë, ku një person dyshohet se ka shtënë në drejtim të një personi tjetër.
Sipas Policisë së Kosovës, ngjarja ka ndodhur rreth orës 11:00 në rrugën “Prekazi”.
Policia ka bërë të ditur se pas të shtënave, në vendin e ngjarjes janë gjetur dhe konfiskuar dy gëzhoja, ndërsa nga i dyshuari, mashkull kosovar, është konfiskuar një armë zjarri, përkatësisht një pistoletë.
“Pas disa të shtënave me armë zjarri, në vendin e ngjarjes janë gjetur dhe konfiskuar dy gëzhoja, ndërsa nga i dyshuar mashkull kosovar është konfiskuar arma/pistoletë”, thuhet në njoftimin e Policisë.
Sipas Policisë, viktima, mashkull kosovar, ka pësuar lëndime trupore si pasojë e një përleshjeje fizike me të dyshuarin.
Me vendim të prokurorit, i dyshuari është arrestuar dhe është dërguar në mbajtje.
Rasti është duke u hetuar nga autoritetet kompetente.