Trajneri i futbollit Hivzi Ahmeti, përmes platformës 1MAXIMUM2 Training Center, po ofron trajnime të avancuara në futboll, me fokus të veçantë në zhvillimin e futbollistëve të rinj përmes metodave moderne dhe qasjeve bashkëkohore të stërvitjes.
Sipas filozofisë së këtyre trajnimeve, theksi nuk vihet te kontrolli i tepruar apo presioni, por te krijimi i kushteve ku lojtarët ndihen të sigurt për të provuar, për të gabuar dhe për të mësuar. Trajnimet synojnë të nxisin mendimin kritik, kreativitetin dhe ndjenjën e përgjegjësisë tek futbollistët, duke u dhënë atyre hapësirë për të marrë vendime vetë në fushë.
Ahmeti thekson se futbolli, veçanërisht ai i të rinjve, ndërtohet mbi kulturë dhe jo mbi modele të ngurta “fabrike”. Sipas tij, mjediset e bazuara vetëm në komandë dhe kontroll prodhojnë bindje, por jo mendimtarë, kreativitet apo pronësi të lojës.
Trajnimet e ofruara nga 1MAXIMUM2 Training Center synojnë të formësojnë lojtarë të kompletuar, duke i udhëhequr pa varësi, duke i mbështetur pa mbrojtje të tepruar dhe duke i inkurajuar pa presion. Qasja bazohet në ndërtimin e një kulture të shëndoshë sportive, ku trajneri nuk dominon ambientin, por i jep formë atij.
Me sloganin “Train Like a Pro”, këto trajnime synojnë të përgatisin gjenerata të reja futbollistësh që jo vetëm dinë të luajnë, por edhe të kuptojnë lojën, të marrin vendime dhe të rriten si sportistë dhe individë.