Nëse do të duhej të zgjidhnit vetëm një nga llojet e drithërave për mëngjes që ndihmon shëndetin me kalimin e viteve, dietologët thonë se tërshëra është një zgjedhje shumë e mirë.
E pasur me fibra, antioksidantë dhe minerale të rëndësishme, ajo mbështet zemrën, lufton sheqerin në gjak dhe kontribuon në jetëgjatësi.
“Tërshëra, kur përgatitet si duhet, mund të mbështesë shëndetin e zemrës, balancën e sheqerit në gjak dhe të shtojë jetëgjatësinë”, ka thënë Vandana Sheth, dietologe e regjistruar, ka shkruar EatingWell.
Pse tërshëra është kaq e dobishme?
Është shumë ushqyese.
Gjysmë filxhani tërshërë e papërpunuar ka rreth 150 kalori, 5 gramë proteina, 4 gramë fibra dhe 10 për qind të nevojës ditore për hekur. Ajo përmban pak yndyrë të ngopur dhe pothuajse aspak kripë. Studimet tregojnë se konsumimi i saj lidhet me peshë më të shëndetshme, sheqer më të qëndrueshëm në gjak dhe rrezik më të ulët për sëmundje të zemrës dhe kancer.
Është e shkëlqyer për zemrën
Tërshëra është e pasur me beta-glukan, një fibër e tretshme që ndihmon në uljen e yndyrës së dëmshme.
“Shtimi i fibrës në dietë është një nga gjërat më të mira që mund të bëni për shëndetin”, ka thënë dietologia Maddie Pasquariello.
Fibrat ndihmojnë edhe në uljen e rrezikut për sulm në tru, diabet të tipit 2 dhe disa lloje kanceri.
Ndihmon në stabilizimin e sheqerit në gjak
Karbohidratet komplekse të tërshërës treten më ngadalë se ato të bukës së bardhë apo drithërave të përpunuara.
“Si rezultat, sheqeri në gjak nuk rritet menjëherë dhe mbetet më i qëndrueshëm”, ka shpjeguar Patricia Kolesa, dietologe.
Për efekt edhe më të mirë, këshillohet të kombinohet me proteina dhe yndyra të shëndetshme, si kos, qumësht, arra apo fara.
Ndihmon në forcimin e trupit
Tërshëra përmban magnez, një mineral që ndihmon në shëndetin e muskujve dhe eshtrave. Mungesa e tij lidhet me rrezik më të lartë për dobësi dhe osteoporozë me kalimin e moshës.
Si ta konsumoni në mënyrë të shëndetshme?
Zgjidhni tërshërë të thjeshtë, pa sheqer të shtuar.
Shtoni fruta të freskëta për ëmbëlsi natyrale.
Shtoni proteina (kos, qumësht, pluhur proteinik, arra).
Rrisni fibrat me fara liri, chia apo fruta.
Mund ta piqni në furrë nëse nuk ju pëlqen tekstura klasike.
Mund ta provoni edhe në versione të kripura me perime, vezë apo djathë.
“Nëse po kërkoni një lloj të drithërave të shëndetshëm për mëngjes që mund t’ju ndihmojë të jetoni më gjatë, tërshëra është zgjedhje fantastike”, theksojnë dietologët.
Si pjesë e një ushqyerjeje të balancuar, ajo mund të ulë rrezikun për sëmundje kronike si sëmundjet e zemrës, diabeti i tipit 2, kanceri dhe dobësia fizike.