Në vazhdën e konstituimit të legjislaturës së dhjetë të Kuvendit të Kosovës, subjektet parlamentare kanë bërë propozimet për postet e nënkryetarëve të Kuvendit.
Lëvizja Vetëvendosje ka propozuar deputetin Ardian Gola për pozitën e nënkryetarit nga radhët e shumicës parlamentare. Ndërkaq, Partia Demokratike e Kosovës ka nominuar Vlora Çitakun për nënkryetare të Kuvendit, ndërsa Lidhja Demokratike e Kosovës ka propozuar Kujtim Shalën për të njëjtin post.
Lista Serbe ka propozuar Sllavko Simiq, komunitetet tjera Emilja Rexhepin.
Propozimet janë bërë në përputhje me Rregulloren e Kuvendit, e cila parasheh që nënkryetarët të zgjidhen nga radhët e partive parlamentare, duke reflektuar përfaqësimin politik në përbërjen e re të legjislaturës.
Zgjedhja e nënkryetarëve pritet të hidhet në votim në seancën plenare, si pjesë e procesit të plotësimit të organeve drejtuese të Kuvendit, pas zgjedhjes së Kryetares së Kuvendit.
Me emërimin dhe votimin e nënkryetarëve, pritet të përmbyllet faza e konstituimit të organeve kryesore të Kuvendit, duke hapur rrugë për funksionalizimin e plotë të punës parlamentare në legjislaturën e re.