Xhiroja e katërt e Superligës së Kosovës në futboll nis sot, me Prishtinën që përballet me Vushtrrinë në Kampin Nacional në Hajvali.
Ndeshja do të zhvillohet nga ora 16:00, ndërsa Prishtina hyn në këtë përballje me synimin për të vazhduar startin pozitiv të sezonit.
Skuadra kryeqytetase ka regjistruar dy fitore në dy ndeshjet e zhvilluara deri më tani, ndaj Ballkanit dhe Llapit. Ndeshja e javës së dytë ndaj Dritës është shtyrë.
Në anën tjetër, Vushtrria kërkon pikët e para të sezonit. Skuadra nga Vushtrria ka pësuar tri humbje në tri ndeshjet e para dhe aktualisht ndodhet në pjesën e poshtme të tabelës.
Programi i xhiros së katërt
Xhiroja vazhdon të shtunën me dy ndeshje.
Llapi – Dukagjini luhet nga ora 16:00, ndërsa në Gjilan, nga ora 19:00, përballen Drita dhe Drenica.
Të dielën janë në program edhe dy ndeshjet e fundit. Ballkani pret Feronikelin ’74, ndërsa Malisheva përballet me Gjilanin. Të dyja ndeshjet nisin në ora 16:00.
Pas tri xhirove të para, skuadrat tashmë kanë nisur të krijojnë diferencat e para në tabelë, ndërsa përballjet e kësaj fundjave mund të ndikojnë në renditjen e hershme të kampionatit.