Zhvillimet e fundit politike në vend kanë nxitur kritika në kohën kur Kosova ashtu si edhe vendet e tjera po luftojnë pandeminë e koronavirusit.
Dalja e LDK-së nga koalicioni me Lëvizjen Vetëvendosje dhe vendimi që të inicioj mocion mosbesimi ndaj Qeverisë në këtë periudhë është duke u kundërshtuar nga mekanizmat ndërkombëtar në vend e madje edhe vetë qytetarët.
Kryetari i Lidhjes Demokratike të Kosovës, Isa Mustafa, sot kërkoi nga kryeministri i Kosovës, Albin Kurti, që ta heqë tarifën ndaj produkteve me origjinë nga Serbia dhe ta anulojë vendimin për shkarkimin e ministrit Agim Veliu.
“Edhe sot përulem para popullit tim dhe kërkoj mirëkuptim nga partia ime. Pres edhe sot që zoti Kurti ta heqë tarifën, ta anulojë vendimin për shkarkimin e z. Veliu. Atij dhe LDK-së t’i kërkojë falje për veprimet e tij dhe të atyre me të cilët ka bashkëpunuar në këtë akt të ulët. Të na japë mundësinë të jemi bashkë në këtë betejë”, tha Mustafa në një postim në Facebook.
E për këtë situatë politike, Ambasada e Amerikës në Kosovë në një përgjigje për Telegrafin nuk ka dhënë asnjë koment duke thënë se vazhdojnë të bashkëpunojnë me institucionet e vendit për luftimin e koronavirusit.
“Ambasada nuk ka asnjë koment në këtë kohë për situatën politike. Ne vazhdojmë të bashkëpunojmë me institucionet e Kosovës për të tejkaluar sfidën e virusit COVID-19”, thuhet në përgjigjen e ambasadës.
Ndryshe nga ambasada amerikane, shefja e Zyrës së Bashkimit Evropian në Kosovë, Nataliya Apostolova ka kërkuar që në këtë periudhë të ketë unitet dhe konsensus politik për të tejkaluar krizën e koronavirusit.
Edhe ambasadori i Britanisë së Madhe, Nicholas Abbott pas takimit që ka zhvilluar dje me kryeministrin Albin Kurti, ka thënë se në këtë situatë të emergjencës së shëndetit publik është esenciale që veprimet politike të institucioneve shtetërore të qeverisen sipas Kushtetutës së Kosovës.
Kujtojmë se e gjithë kjo situatë politike ndodhi pasi që kryeministri Albin Kurti, shkarkoi ministrin e Brendshëm, Agim Veliu, duke thënë se ai nuk i ka mbështetur qëndrimet e qeverisë për gjendjen e jashtëzakonshme rreth koronavirusit dhe se ka përhapur panik në lidhje me këtë sëmundje.