A kanë njerëzit vërtetë nevojë për kafen e mëngjesit? Me gllënjkën e parë të kafesë, kafeina hyn në qarkullimin e gjakut dhe fillon të bëjë rrugën e saj drejt trurit, ku bllokon një neurotransmetues frenues të quajtur adenozinë. Ky proces rezulton në lirimin e hormoneve, si dopamina dhe serotonina, të cilat kanë efekt stimulues.
Koha e nevojshme për të reduktuar sasinë e kafeinës në trupin tonë me 50% është mesatarisht rreth pesë orë. Kjo shpjegon pse njerwzit mund të dëshirojnë një kafe tjetër pas disa orësh. Megjithatë, se sa shpejt kafeina largohet nga sistemi varet nga shumë gjëra, duke përfshirë moshën, kushtet mjekësore dhe ndërveprimet me ilaçet.
Tobias Van Schneider, një dizajner grafik që jeton në Nju Jork, vendosi që të hiqte dorë nga kafeja dhe alkooli për disa kohë dhe ka treguar çfarë i ndodhi.
Kështu Van Schneider vendosi për 27 muaj të mos pinte asnjë pikë kafe apo alkool për të parë se çfarë do të ndodhte me trupin e tij dhe jetën e tij në vazhdimësi. Siç pretendon ai, rezultatet ishin të mahnitshme, por jo për arsyen që mund të mendohet.
“Gjëja e parë që pashë rënie në jetën time të përditshme janë thashethemet. Mungesa e ndërveprimit social ishte një nga ndryshimet kryesore dhe një nga rezultatet më intensive dhe të shpejta që solli dieta ime e re. Kur një grup njerëzish më kërkuan të bashkohesha me ta për të pirë, unë zgjodha të refuzoja. Mendoj se nuk doja t’i dëgjoja thashethemet esëll”, Tobias.
Por ai pa ndryshime edhe në llogarinë e tij bankare.
“Duke ndërprerë kafenë dhe alkoolin, vura re se po shpenzoja shumë më pak para. Kishte muaj që më kishin mbetur edhe 1000 dollarë. Dhe kjo sepse çdo ditë pija të paktën dy pije pas punës dhe patjetër një kafe”, tha ai.
Në lidhje me shëndetin e tij, Van Schneider konsideron se cilësia e gjumit ka ndryshuar në mënyrë drastike.
“Unë fle më mirë dhe zgjohem me shumë më tepër energji. Pija mund të më ketë relaksuar përkohësisht, por më ka shkaktuar edhe probleme me oreksin”, tregoi Van Schneider. /Abcnews/