Që nga e diela, mbi 1 mijë banorë të gjashtë fshatrave të Deçanit, kanë kërkuar ndihmë në QKMF-në e këtij qytetit, për shkak të dyshimit se janë helmuar nga uji.
Organet e drejtësisë gjatë ditës së djeshme kanë nisur hetimet për një vdekje të dyshimtë që ndodhi pasdite në fshatin Prilep të Deçanit.
Por, kjo nuk është vdekja e vetme për zbardhjen e të cilës ka nisur hetimet Prokuroria Themelore në Pejë.
Zëdhënësi i kësaj prokurorie, Shkodran Nikçi, tha për Sinjalin se gjatë 24-orëve të fundit në komunën e Deçanit kanë ndodhur dy raste të vdekjeve të dyshimta.
Shkaku i vërtetë i vdekjes së tyre do të kuptohet vetëm pasi të dalin rezultatet e autopsisë së trupave të pajetë.
“Gjatë 24 orëve të fundit, kanë ndodhur dy vdekje të dyshimta në komunën e Deçanit. Për shkak të situatës se krijuar në atë rajon, Prokurori kujdestar i Departamentit të Krimeve të Rënda, ka urdhëruar që trupat e pajetë të dërgohen për obduksion në IML për të kuptuar me shumë lidhur me rrethanat e vdekjes se tyre”, tha ai.