Zëvendëskryeministri i parë Avdullah Hoti e sheh shqetësuese faktin që kompania Contour Global ka ndërprerë planet për ndërtimin e Termocentralit “Kosova e Re”.
Ai në Klan Kosova ka thënë se nëse tërheqja e këtij investitori – prapa të cilit ka qëndruar qeveria amerikane – nga Kosova ka ndodhur për arsye politike, atëherë kjo duhet ta shqetësojë Qeverinë e Kosovës.
“Është shqetësuese. Në rast se njëra nga arsyet është edhe për arsye politike tërheqja nga ky projekt është shqetësuese për Qeverinë e Kosovës. Kushdo që e intepreton ndryshe bën gabim të madh politik, nëse e relativizon në atë masë sa e bën të parëndësishëm tërheqjen e këtij investitori nga Kosova. Prapa këtij investitori ka qëndruar Qeveria e Shteteve të Bashkuara të Amerikës dhe këtë duhet ta ketë të qartë secili politikan në Kosovë”.
“Projekti ka pasur dhe ka ende plot të panjohura – sa do të jetë kostoja e furnizimit me energji elektrike, por mbi të gjitha ne gjithmonë jemi nisur nga parimi i nevojës që ka shteti i Kosovës për furnizim stabil me energji elektrike”.
Avdullah Hoti ka ngritur shqetësime se nëse në vitet e ardhshme nuk do të ndërtohen termocentrale të reja, atëherë Kosova do të përballet me problemin e furnizimit stabil me energji elektrike.
“Nëse nuk ndërtohen termocentrale të reja në vitet e ardhshme, ne nuk kemi furnizim stabil me energji elektrike. Kjo është e qartë dhe bazuar në këtë disa qeveri me radhë janë marrë me këtë projekt, sepse ky projekt nuk është i ri”.
“Ka filluar prej viti 2006-2007, derisa ideja për të ndërtuar një termocentral me 2000 megavatë është prej vitit 1987. Është reduktuar dhe ndryshuar me kalimin e viteve dhe kemi ardhë deri te versioni i fundit për të cilin është nënshkruar një parakontratë me qeverinë e mëparshme. Ne si qeveri e re e themeluam komisionin ndërministror nga pesë ministra për të menaxhuar me këtë projekt dhe ne prisnim që ky komision të sjellë informata në qeveri se në çfarë faze është ky projekt dhe çfarë duhet të bëjmë ne si qeveri për të çuar këtë projekt përpara. Tërheqjen e tyre e kemi marrë vërtetë me shqetësim, dhe sapo të kalojmë këtë situatë në të cilën po kalojmë si shoqëri duhet ta adresojmë urgjentisht çështjen e furnizimit stabil me energji elektrike”, theksoi zëvendëskryeministri Avdullah Hoti.