Infektologu i QKUK-së, Valbon Krasniqi, ka deklaruar se gjendja shëndetësore e pacientëve që janë të shtrirë në Infektiven e QKUK-së e që e bartin virusin covid-19, është stabile.
Krasniqi ka treguar se në Infektiven e QKUK-së, janë 28 pacientë që bartin koronavirusin. Shtatë prej tyre janë me terapi me oksigjen. Gjendja e tyre është stabile për momentin.
“Aktualisht në Infektivë i kemi 28 persona të shtrirë që e bartin koronavirusin. Të tjerët janë duke u trajtuar në shtëpitë e tyre në vetë izolim”, tha Krasniqi.
Ai ka sqaruar se dy javët e ardhshme pritet që të jenë vendimtare për vendin sa i përket koronavrussit.
“Ne jemi në fillim të pandemisë. Është e pritshme që gjatë 23- javëve të ardhshme të kemi më shumë pacientë të prekur. Tashmë kjo punë është ekskluzivisht në dorën e qytetarëve. Varet nga ta se sa i respektojnë këshillat e mjekëve”, theksoi Valbon Krasniqi.
Në Kosovë janë të prekur nga koronavirusi 63 persona. Gjatë ditës së sotme pritet të dalin rezultate të tjera.