Juristi Dastid Pallaska ka kritikuar sot kreun e Qeverisë, Albin Kurtin për të cilin ka thënë se do të duhej të shkonte deri në hënë për të marrë vesh nëse ka një marrëveshje të dëmshme për Kosovën, raporton Gazeta Express.
Pallaska ka shkruar në Facebook se një Kryeministër i aftë dhe guximshëm do ta kundërshtonte një marrëveshje të tillë nga pozita e tij kudo, para çdokujt dhe në çdo kohë.
“Vetëm një Kryeministër popullist e braktisë pozitën e vet – duke prishur qëllimisht koalicionin qeverisës – dhe me oratori mundohet të mbulojë mungesën e aftësisë dhe guximit për t’i shërbyer vendit në një moment testimi”, ka shkruar ai.
Këto komente Pallaska i ka bërë pas reagimit që kryeministri i Kosovës, Albin Kurti e pati në seancën e Kuvendit ku deklaroi se presidenti Hashim Thaçi është duke tentuar që të bëjë një marrëveshje të dëmshme Prishtinë – Beograd, ku përfshihet edhe shkëmbimi me territore.