Ministria e Industrisë, Ndërmarrësisë, Tregtisë dhe Inovacionit (MINTI) ka publikuar çmimet maksimale të lejuara të derivateve për ditën e sotme, duke njoftuar për një tjetër rritje të çmimit të naftës në tregun vendor.
Sipas njoftimit zyrtar, një litër naftë do të shitet me çmimin maksimal prej 1.52 euro, duke shënuar rritje krahasuar me ditët e fundit.
Ndërkohë, benzina do të tregtohet me çmim prej 1.42 euro për litër, ndërsa gazi (LPG) do të kushtojë 0.71 euro për litër.
Rritja e çmimit të naftës vjen në një periudhë kur tregjet ndërkombëtare të energjisë po përballen me luhatje të vazhdueshme, të ndikuara nga zhvillimet gjeopolitike dhe ndryshimet në ofertën globale të naftës.
MINTI thekson se këto çmime vlejnë vetëm për ditën e sotme dhe janë përcaktuar në kuadër të monitorimit të rregullt të tregut të derivateve, me qëllim garantimin e transparencës dhe mbrojtjen e konsumatorëve.
Autoritetet kompetente kanë bërë të ditur se do të vazhdojnë monitorimin e tregut dhe publikimin e përditshëm të çmimeve, ndërsa operatorët ekonomikë obligohen t’i respektojnë çmimet e përcaktuara nga ministria.
