U.D. Kryeshefi Ekzekutiv i Operatorit të Sistemit, Transmisionit dhe Tregut (KOSTT), Shaban Neziri, ka pritur sot në takim Drejtorin e Agjencisë së Kosovës për Inteligjencë (AKI), Petrit Ajeti.
Gjatë takimit, palët kanë diskutuar për rëndësinë strategjike të sektorit energjetik, infrastrukturën kritike të KOSTT-it, planet zhvillimore, si dhe çështjet e sigurisë shtetërore që lidhen me mbrojtjen dhe funksionimin e qëndrueshëm të sistemit elektroenergjetik.
Në kuadër të vizitës, përfaqësuesit e AKI-së janë njoftuar nga afër me rolin dhe përgjegjësitë e KOSTT-it në sigurimin e stabilitetit dhe besueshmërisë së rrjetit elektroenergjetik, përfshirë masat dhe kapacitetet mbrojtëse që kontribuojnë në funksionimin e pandërprerë të infrastrukturës vitale.
Takimi është zhvilluar në kuadër të bashkëpunimit institucional për identifikimin dhe adresimin e rreziqeve potenciale që mund të cenojnë sigurinë e Kosovës, me fokus të veçantë te kërcënimet ndaj infrastrukturës kritike, përfshirë rreziqet e sabotimit dhe cenimet e sigurisë.
KOSTT ka vlerësuar se bashkëpunimi ndërinstitucional mbetet thelbësor për shkëmbimin e informatave, koordinimin e masave parandaluese dhe forcimin e mekanizmave mbrojtës të infrastrukturës kritike energjetike, duke siguruar një reagim të koordinuar dhe rritje të qëndrueshmërisë përballë sfidave të sigurisë.
Në fund, KOSTT e ka vlerësuar lart vizitën e Drejtorit të AKI-së si dëshmi të angazhimit të përbashkët institucional për forcimin e sigurisë dhe qëndrueshmërisë së infrastrukturës energjetike në Republikën e Kosovës.