Edhe pse nuk ekziston një ushqim i vetëm që mund t’i parandalojë plotësisht sëmundjet kardiovaskulare, ekspertët e shëndetit theksojnë se ushqyerja e shëndetshme luan rol vendimtar në uljen e rrezikut për problemet me zemrën.
Sipas dietologes së specializuar në shëndetin e zemrës, Laura Yautz, dietat më të mira për zemrën janë ato që bazohen kryesisht në ushqime bimore, të pasura me fibra, vitamina dhe yndyra të shëndetshme.
Një dietë e shëndetshme për zemrën përfshin konsumimin e rregullt të drithërave integrale, frutave dhe perimeve të freskëta, arrave, farave dhe vajrave të shëndetshëm, në veçanti vajin e ullirit. Po ashtu, rekomandohen burimet e proteinave me bazë bimore, si bishtajoret dhe soja, si dhe proteina të dobëta shtazore, kryesisht ushqimet e detit dhe mishi i shpendëve.
Ekspertët theksojnë se ky lloj ushqimi ndihmon në uljen e kolesterolit të keq, rregullimin e presionit të gjakut dhe ruajtjen e peshës trupore, faktorë kyç për shëndetin e zemrës dhe enëve të gjakut.
Në anën tjetër, nga dieta duhet të shmangen ushqimet e skuqura, sheqernat e tepërta, produktet e paketuara dhe të përpunuara, pijet me sheqer, si dhe produktet e rafinuara të grurit, të cilat lidhen drejtpërdrejt me rritjen e rrezikut për sëmundje kardiovaskulare.
Sipas specialistëve, ndryshimet e vogla, por të qëndrueshme në mënyrën e të ushqyerit, mund të kenë ndikim të madh në shëndetin afatgjatë. Një dietë e balancuar sot, do të thotë një zemër më e fortë nesër.