Deputetët e zgjedhur të Kuvendit të Kosovës do të mblidhen sot në përpjekjen e 25-të me radhë për ta konstituuar përbërjen e re parlamentare, që doli nga zgjedhjet e mbajtura më 9 shkurt.
Seanca është thirrur për ora 10:30, ndërsa pritet të rikthehet në rend dite çështja e zgjedhjes së kryetarit të Kuvendit, një hap i domosdoshëm për funksionalizimin e institucioneve të reja dhe formimin e Qeverisë.
Propozimi për kryetar i takon partisë fituese të zgjedhjeve, Lëvizjes Vetëvendosje e cila deri tani ka qëndruar pas kandidaturës së Albulena Haxhiut, e cila po kundërshtohet nga partitë e tjera.
Për konstituimin e plotë të legjislaturës së nëntë, përveç kryetarit duhet të zgjidhen edhe pesë nënkryetarë të Kuvendit.
Deri më tani mospajtimet politike kanë pamundësuar arritjen e një marrëveshjeje mes subjekteve parlamentare.
Sot pritet të shihet nëse do të ketë lëvizje drejt zgjidhjes së ngërçit institucional që po zgjat tashmë prej muajsh.