Kryeministri i Kosovës, Albin Kurti, pas takimit me kryetarin e Partia Demokratike e Kosovës (PDK), Bedri Hamza, ka deklaruar se synimi i tij mbetet sigurimi i 80 votave për zgjedhjen e Presidentit.
Ai bëri të ditur se në takim nuk është diskutuar për emra konkretë, por e cilësoi si lajm të mirë faktin që PDK ka vendosur të propozojë kandidatin e saj, çka sipas tij hap rrugë për një garë javën e ardhshme. Kurti theksoi se deri më tani nuk është arritur konsensus për një kandidat të përbashkët, andaj nëse mungon marrëveshja politike, do të ketë propozime partiake.
Sipas tij, mazhoranca aktualisht ka 66 deputetë, ndërsa PDK-ja 22, duke qenë subjekti i dytë për nga pesha në Kuvend. Ai nënvizoi se për një proces të rregullt kërkohet garë, në përputhje me aktgjykimin e Gjykatës Kushtetuese, i cili nuk lejon që në fletëvotim të jetë vetëm një kandidat.
Kurti paralajmëroi se çështja e Presidentit do të diskutohet edhe në mbledhjen e Këshillit të Përgjithshëm të Lëvizja Vetëvendosje, duke shtuar se në mungesë të një kandidature konsensuale, partitë pritet të dalin shpejt me propozimet e tyre konkrete.