Prishtina sot ndodhet përballë një afati vendimtar për funksionimin e institucioneve, pasi 6 tetori është dita e fundit për zgjedhjen e presidentit të ri të Kosovës.
Gjykata Kushtetuese ka përcaktuar se, nëse presidenti nuk zgjidhet brenda këtij afati, Kuvendi shpërndahet dhe vendi shkon në zgjedhje të reja brenda 45 ditësh.
Në këtë situatë, vëmendja është përqendruar te zhvillimet politike të ditës, ndërsa kryeministri Albin Kurti pritet të mbajë konferencë për media në orën 15:00, në ndërtesën e Qeverisë.
Konferenca vjen në ditën kur skadon afati kushtetues për zgjedhjen e presidentit. Kurti, i pyetur sot nëse do të ketë takime të reja për çështjen e presidentit apo nëse do të thirret seancë e Kuvendit, nuk dha detaje, duke thënë se për këto çështje do të flitet në Kuvend dhe Qeveri.
Kështu, dita e sotme mund të jetë vendimtare për dy skenarë: arritjen e një marrëveshjeje politike dhe zgjedhjen e presidentit, ose dështimin për ta zgjedhur atë, që sipas përcaktimit të Gjykatës Kushtetuese e çon vendin drejt zgjedhjeve të reja.
Kryeministri Kurti, në fjalimin e tij në Kuvend një ditë më parë, e kishte cilësuar zgjedhjen e presidentit si të domosdoshme për funksionimin institucional të vendit, duke paralajmëruar se mungesa e presidentit dhe përsëritja e zgjedhjeve mund të krijojnë pasiguri institucionale.
Fjala e fundit për zhvillimet politike të ditës pritet të jepet nga Kurti në konferencën e orës 15:00.