Agjërimi i ndërprerë, i njohur si “Intemittent fasting” u bë shumë popullor në vitin 2013 falë dietës 5:2 të Michael Mosley. Shumë njerëz tregonin se kjo metodë i ndihmonte të dobësoheshin dhe të përmirësonin shëndetin.
Por një analizë e re e publikuar në Cochrane Library vë në dyshim efektivitetin e saj.
Sipas përfundimeve, “krahasuar me këshillat e zakonshme dietike, agjërimi i ndërprerë mund të sjellë pak ose aspak ndryshim në rënien në peshë apo cilësinë e jetës”.
Madje, një artikull i vitit 2026 në British Medical Journal e përshkroi si “jo më të mirë se dieta tradicionale” dhe “vetëm pak më të mirë se të mos bësh asgjë”, ka shkruar The Independent.
Pse ndodh kjo?
Sipas dietologes Vassiliki Sinopoulou, përgjigjja është e thjeshtë: “Çdo ulje e kalorive çon në rënie në peshë. Kjo nuk është ndryshe nga çdo dietë tjetër.”
Pra, agjërimi funksionon vetëm nëse të ndihmon të hash më pak kalori. Nëse një person agjëron një ditë, por ditën tjetër ha shumë më tepër, ai sërish mund të shtojë peshë.
“Të gjithë duan të gjejnë atë një gjë që është përgjigjja për gjithçka. Por kur vjen puna te dieta, është thjesht çështje e të ushqyerit mirë. Për rënie në peshë, duhet të shohim konsumin total të kalorive, jo vetëm faktin që po agjërojmë”, ka thënë Nutricionistja Amie Leckie nga Heart Research UK.
Çfarë është agjërimi i ndërprerë?
Ekzistojnë disa forma:
-Dieta 5:2: dy ditë në javë konsumohen shumë pak kalori (rreth 600), ndërsa ditët e tjera hahet normalisht.
– Agjërimi çdo ditë tjetër.
-Ushqyerja me interval kohor (p.sh. 16:8), ku hahet brenda një dritareje 8-orëshe dhe agjërohet 16 orë.
A ka ndonjë përfitim?
Ani pse për rënie në peshë agjërimi nuk duket superior ndaj dietave të tjera, mund të ketë përfitime të tjera.
Leckie ka thënë se ka studime që tregojnë përmirësim të nivelit të yndyrës së dëmshme në gjak, presionit të gjakut dhe ulje të inflamacionit.
“Kur agjërojmë, i japim trupit pak pushim. I japim kohë të punojë në nivel qelizor dhe të riparohet”, ka thënë ajo. Sipas saj, kjo mund të ulë edhe nivelin e proteinës C-reaktive (CRP), një tregues i inflamacionit.
Megjithatë, ajo ka theksuar se nuk ka formulë magjike.
“Unë personalisht nuk bëj agjërim të ndërprerë. Por sigurohem që vakti i darkës të ketë proteina, fibra, yndyra dhe karbohidrate të mjaftueshme, që të mos kem uri deri në mëngjes. Është kthim te bazat”, ka thënë ajo.
Edhe studiuesi Valter Longo, i cili frymëzoi dietën 5:2, preferon një dritare 12-orëshe ushqimi, sepse përputhet më mirë me ritmin natyror ditë-natë dhe është më e lehtë për t’u mbajtur.
Pse injeksionet për dobësim nuk janë zgjidhja?
Sinopoulou nuk është mbështetëse e përdorimit të gjerë të ilaçeve për rënie në peshë.
“Këto barna mund të çojnë në rënie në peshë sepse nuk ndihesh i uritur. Por kur shihet si ndryshim afatshkurtër, njerëzit kthehen te zakonet e vjetra dhe e rifitojnë peshën, ndonjëherë edhe më shumë”, ka thënë ajo.
Ato mund të kenë rol për persona me rrezik të lartë shëndetësor, por jo si zgjidhje estetike e përkohshme.
Çfarë funksionon vërtet?
Ekspertët bien dakord për disa rregulla të thjeshta:
-Mbaje të thjeshtë
Një dietë e shëndetshme duhet të jetë e pasur me fruta dhe perime dhe të ketë kalori të përshtatshme për peshën dhe stilin tënd të jetesës. Studime nga Karolinska Institutet tregojnë se ushqyerja me bazë bimore lidhet me plakje më të ngadaltë dhe më pak sëmundje kronike.
-Jep përparësi proteinës dhe fibrës
Proteina dhe fibra të mbajnë të ngopur më gjatë, stabilizojnë sheqerin në gjak dhe përmirësojnë shëndetin e zorrëve.
“Në mënyrë ideale, duhet të konsumojmë rreth 30 lloje të ndryshme bimësh në javë”, ka thënë Leckie.
-Gatuaj në shtëpi
“Ushqimet shumë të përpunuara po dëmtojnë shëndetin tonë. Nëse nuk mund ta përgatisësh në kuzhinën tënde, mos e ha”, ka paralajmëruar Leckie.
Dëgjo trupin tënd
Sinopoulou jep një këshillë të thjeshtë: mëso të dallosh urinë reale nga dëshira.
“Nëse stomaku po të gurgullon, kjo është uri fiziologjike. Nëse sheh një reklamë çokollate dhe mendon ‘sa mirë do ishte’, kjo është më shumë dëshirë”, ka thënë ajo.