Pas rinumërimit të 100 për qind të fletëvotimeve në komunën e Skenderajt, janë evidentuar ndryshime në numrin e votave për disa kandidatë për deputetë, kryesisht nga radhët e Partisë Demokratike të Kosovës (PDK), por edhe të Lidhjes Demokratike të Kosovës (LDK).
Sipas të dhënave nga procesi i rinumërimit, kandidatëve të PDK-së u janë hequr një numër i caktuar votash, për shkak të parregullsive të konstatuara gjatë verifikimit të fletëvotimeve. Kandidati Mërgim Lushtaku ka humbur 94 vota, Shahin Dervishaj 42 vota, ndërsa Sala Jashari 36 vota.
Ndryshime janë shënuar edhe te LDK-ja, ku kandidatit Halil Geci i janë hequr 22 vota pas përfundimit të procesit të rinumërimit.
Rinumërimi është zhvilluar me vendim të Komisionit Qendror të Zgjedhjeve (KQZ), me qëllim të verifikimit të saktësisë së rezultateve fillestare dhe garantimit të pasqyrimit të drejtë të vullnetit të qytetarëve.
Nga institucionet përgjegjëse është bërë e ditur se rinumërimi ka qenë proces teknik dhe ligjor, ndërsa çdo ndryshim në rezultatet finale do të reflektohet në tabelat zyrtare të KQZ-së.
Procesi i rinumërimit në disa komuna të vendit ka nxitur debat publik, ndërkohë që KQZ ka theksuar se transparenca dhe integriteti i procesit zgjedhor mbeten prioritet kryesor.