Aron Babaj po konsiderohet një nga talentët më premtues të gjeneratës së re të futbollit në Kosovë. Hapat e parë drejt ndërtimit të karrierës së tij futbollistike ai i ka hedhur në qendrën “1Maximum2 Training Center”, ku po zhvillohet nën drejtimin profesional të trajnerit Hivzi Ahmeti.
Më herët, Babaj ka qenë pjesë edhe e shkollës së futbollit “FS Young Boys”, aty ku filloi të shfaqë potencialin dhe aftësitë e tij të veçanta në fushë.
Sipas trajnerit Ahmeti, në stërvitjet individuale Aron Babaj ka treguar shkathtësi të jashtëzakonshme me topin, inteligjencë loje dhe qetësi në vendimmarrje – cilësi që e veçojnë dukshëm nga bashkëmoshatarët e tij. Stili elegant i lojës, kontrolli i shkëlqyer i topit dhe vizioni në fushë e afrojnë profilin e tij me atë të legjendës Zinedine Zidane, duke dhënë sinjale se bëhet fjalë për një talent të rrallë në futbollin kosovar. Ndërkohë, “1Maximum2 Training Center” po vazhdon të dëshmohet si një vatër serioze e zhvillimit të futbollistëve të rinj, duke përgatitur lojtarë për nivele të larta konkurruese, përfshirë Superligën e Kosovës dhe skena më të mëdha ndërkombëtare.
Aron Babaj tashmë shihet si një emër për t’u mbajtur mend, ndërsa puna dhe përkushtimi mbeten çelësi i rrugëtimit të tij drejt suksesit.