Bashkimi Evropian ka vendosur të ndërpresë përkohësisht mbajtjen e takimeve me kryeministrin në detyrë Albin Kurti dhe kabinetin e tij në objektin zyrtar të Qeverisë së Kosovës, deri në formimin e një qeverie me mandat të plotë.
Ky qëndrim është bërë i ditur dje, përmes një letre që shefi i Zyrës së BE-së në Kosovë dhe Përfaqësuesi i Posaçëm i BE-së, Aivo Orav, i ka dërguar Kurtit më 8 gusht 2025.
Në dokument thuhet se vendimi pason aktgjykimin e Gjykatës Supreme të Kosovës, më 25 qershor, që shpalli të pavlefshëm një udhëzim të Ministrisë së Financave lidhur me ushtrimin paralel të funksioneve ministrore dhe atyre parlamentare, duke u bazuar në nenin përkatës të Kushtetutës.
“Ky vendim konfirmon përkushtimin tonë për sundimin e ligjit, llogaridhënien dhe respektimin e institucioneve demokratike. Për të shmangur paqartësitë dhe interpretimet e gabuara, vizitat e përfaqësuesve të BE-së dhe shteteve anëtare brenda ndërtesës së Qeverisë do të shtyhen përkohësisht, derisa të krijohet një qeveri e re me mandat të plotë”, thuhet në letrën e Oravit.
Megjithatë, BE-ja thekson se angazhimi i saj ndaj Kosovës mbetet i pandryshuar dhe se bashkëpunimi me institucionet kosovare në fusha të ndryshme do të vazhdojë edhe gjatë kësaj periudhe.
“Presim që qeveria e re të formohet pa vonesa të mëtejshme, në mënyrë që të rikthehet dinamika e plotë e bashkëpunimit dhe të avancojmë marrëdhëniet politike dhe ekonomike mes BE-së dhe Kosovës”, thekson më tej letra.
Në reagim ndaj këtij zhvillimi, Qeveria në detyrë ka thënë se Kryeministri Albin Kurti vazhdon të ushtrojë detyrën dhe se zyra e tij mbetet vendi i zakonshëm për takime.
“Pavarësisht situatës aktuale politike, z. Kurti është ende kryeministër në detyrë dhe zyra e tij në objektin e Qeverisë është vendi ku ai ushtron punën. Çdo takim kërkohet të zhvillohet aty, përveç rasteve kur palët bien dakord për ndonjë vend tjetër”, tha zëdhënësi i Qeverisë në detyrë, Përparim Kryeziu.
Ai shtoi se takime jashtë Kryeministrisë kanë ndodhur edhe më parë, edhe kur Kurti ka qenë në mandat të plotë.