Shtetet e Bashkuara kanë mirëpritur marrëveshjen e arritur ndërmjet Kosovës dhe Serbisë në Bruksel për targat, gjë që, sipas Departamentit të Shtetit, ndikon për të shmangur përshkallëzimin e mëtejshëm të tensioneve.
“Ne përgëzojmë më tej marrëveshjen e dy vendeve për t’u përqendruar plotësisht dhe urgjentisht në normalizimin e marrëdhënieve nën dialogun e lehtësuar nga BE. Ne mbështesim dialogun e lehtësuar nga BE-ja si rruga më e mirë për të avancuar të ardhmen evropiane të Serbisë dhe Kosovës”, thotë zëdhënësi i DASH-it, Ned Price, raporton Klankosova.tv.
Më tej thuhet se mirëpritet vendimi i palëve “për të vënë interesat e të gjithë njerëzve të tyre në krye të vendimmarrjes dhe të ndërmarrin hapa për të përmirësuar jetën e përditshme të qytetarëve të tyre”.
“Të dy palët bënë një hap gjigant përpara sot, me lehtësimin e BE-së, drejt garantimit të paqes dhe stabilitetit në të gjithë rajonin. Shtetet e Bashkuara përshëndesin negociatat konstruktive dhe inkurajojnë përparimin e mëtejshëm drejt normalizimit të marrëdhënieve”, përfundoi DASH-i.
Kujtojmë se SHBA-ja ka qenë ndër më të zëshmet nga partnerët ndërkombëtarë të Kosovës për arritjen e marrëveshjes, gjegjësisht për shtyrjen e masave ndëshkuese për serbët e Kosovës që bartin targa ilegale në veturat e tyre.