Euronews: Kurti po e sfidon presionin perëndimor mbi marrëdhëniet me Serbinë

Euronews ia ka kushtuar një artikull kryeministrit Kurti, i cili, sipas mediumit, po sfidon presionin perëndimor për arritjen e marrëveshjes me Serbinë.

Nën presionin në rritje nga aleatët e tij amerikanë dhe evropianë për të arritur një marrëveshje me Serbinë, kryeministri i Kosovës, Albin Kurti, paralajmëroi të mërkurën se nuk do t’i dorëzohej “shantazhit”, shkruan Euronews, transmeton Reporteri.

Derisa, bazuar në fjalët e kryeministrit Kurti, se ShBA dhe Bashkimi Evropian kanë kërkuar që mes Kosovës dhe Serbisë të arrihet një marrëveshje para marsit, afati po afrohet shumë shpejt, shkruan tutje.

“Në qendër të tensioneve mes dyshes është refuzimi i Beogradit për të njohur pavarësinë e Kosovës. Fuqitë perëndimore, të udhëhequra nga SHBA-të, duan që territori i vogël ballkanik prej 1.8 milionë banorësh të krijojë një shoqatë komunash ku jetojnë pjesëtarët e pakicës serbe. Kjo ide u propozua për herë të parë sipas një marrëveshjeje të lidhur nën sytë e Brukselit një dekadë më parë”, vazhdon artikulli.

Mirëpo, “Euronews” në fokus ka vendosur fakti se kryeministri Albin Kurti po u reziston thirrjeve për themelim të Asociacionit, pavarësisht presionit perëndimor pasi “Kurti pretendon se kjo do të përbënte krijimin e një fuqie potencialisht nënqmuese serbe paralelisht me institucionet kosovare”.

Artikulli shqip:

Nën presionin në rritje nga aleatët e tij amerikanë dhe evropianë për të arritur një marrëveshje me Serbinë, kryeministri i Kosovës paralajmëroi të mërkurën se nuk do t’i dorëzohej “shantazhit”.

Marrëdhëniet midis Beogradit dhe Kosovës janë përshkuar nga kriza në krizë dhe fuqitë perëndimore duan t’i japin fund ciklit të tensioneve në këtë cep të Evropës Juglindore.

Afati i fundit që Kosova të nënshkruajë një pakt me armikun e vjetër po afrohet me shpejtësi.

Në një intervistë për AFP, kryeministri i Kosovës Albin Kurti pohoi se ShBA-ja dhe BE-ja kishin kërkuar që Beogradi dhe Prishtina të arrijnë një marrëveshje deri në mars.

Prej muajsh, diplomatë evropianë dhe amerikanë kanë lëvizur mes dy kryeqyteteve për këtë qëllim, shpjegoi ai.

Në qendër të tensioneve mes dyshes është refuzimi i Beogradit për ta njohur pavarësinë e Kosovës.

Kosova, shtëpi e shumicës shqiptare, u shkëput në vitin 2008, një dekadë pas një lufte të përgjakshme që përfundoi me një fushatë bombardimi të NATO-s të udhëhequr nga ShBA-ja.

15 vjetori i shpalljes së pavarësisë së Kosovës është më 17 shkurt.

Sipas Kurtit, “qendër” e çdo pakti duhet të jetë njohja e Kosovës nga Serbia, e cila me mbështetjen e aleatit të saj rus e bllokon Prishtinën që të marrë një vend në OKB.

“Pengesa jonë më e madhe është se Beogradi insiston në kërkimin e makinës së kohës,” insistoi lideri kosovar.

Por “nuk është e mundur. Kosova është një vend i pavarur dhe do të ishte më mirë që Serbia ta njohë atë”, vazhdoi ai, duke thënë se kjo mund të përshpejtojë integrimin evropian të Beogradit.

Fuqitë perëndimore, të udhëhequra nga ShBA-ja, duan që territori i vogël ballkanik prej 1.8 milionë banorësh të krijojë një Asociacion komunash ku jetojnë qytetarët e pakicës serbe. Kjo ide u propozua për herë të parë sipas një marrëveshjeje të lidhur nën sytë e Brukselit një dekadë më parë.

Kurti pretendon se kjo do të përbënte krijimin e një fuqie potencialisht subversive serbe paralelisht me institucionet kosovare.

Minoriteti serb i Kosovës, rreth 120,000 njerëz, refuzon besnikërinë ndaj qeverisë së Prishtinës. Të inkurajuar nga Beogradi, pati protesta dhe incidente të dhunshme në fund të vitit të kaluar, veçanërisht në veri.

“Ne nuk mund të shantazhohemi”, tha Kurti. “Ne nuk kemi frikë. Ne jemi një popull i guximshëm që kërkojmë trajtim të drejtë, barazi dhe njohje reciproke.”

“Nuk është e drejtë të bësh presion mbi vendin më pro-evropian, më proamerikan, më demokratik në Ballkanin Perëndimor”, tha ai. “Është Beogradi ai që duhet të jetë nën presion. Serbia nuk është një vend normal. Serbia nuk e di se ku janë kufijtë e saj”.

Edhe presidenti serb Aleksandër Vuçiq u ankua kohët e fundit për presionin e Perëndimit për të normalizuar marrëdhëniet me Kosovën.

“Ata thanë: duhet ta pranoni këtë plan, përndryshe do të duhet të përballeni me një ndërprerje të procesit të integrimit evropian, një ndalim dhe tërheqje të investimeve dhe një sërë masash ekonomike dhe politike që do t’i bëjnë shumë dëm Serbisë”, tha ai për televizionin serb.