Aleanca ka dorëzuar kallëzim penal në Prokurorinë Speciale ndaj Qeverisë në detyrë, lidhur me 17 vendime të miratuara më 12 gusht për emërimin e komisioneve për rekrutimin e zyrtarëve të lartë shtetërorë.
Deputeti i Aleancës, Besnik Tahiri, tha se këto vendime janë në kundërshtim me Ligjin për Qeverinë, duke theksuar se kompetencat e një qeverie në detyrë janë të kufizuara.
“Qeveria në detyrë nuk guxon në asnjë moment të shkelë ligjin që vetë e ka miratuar. Kjo qeveri i ka kompetencat dhe detyrimet e kufizuara.”
Tahiri kritikoi edhe vazhdimin e ushtrimit të funksioneve ekzekutive nga deputetët që janë betuar në Kuvend.
“Nuk mundesh me shkuar paradite në seancë me u betuar si deputet, me votuar si deputet dhe pastaj pasdite me vazhduar në qeveri dhe me ushtruar detyra ekzekutive si ministër në detyrë, respektivisht kryeministër.”
Ndër vendimet e miratuara më 12 gusht janë edhe ato për emërimin e komisioneve për përzgjedhjen e zëvendësdrejtorit të përgjithshëm të Agjencisë Shtetërore të Arkivave të Kosovës, sekretarit të përgjithshëm në Ministrinë e Shëndetësisë, si dhe drejtuesve të disa agjencive dhe institucioneve të tjera.
Aleanca ka kërkuar që organet e drejtësisë të hetojnë ligjshmërinë e këtyre vendimeve.